Iron Cup txapelketa apirilaren 25etik maiatzaren 30era artean jokatuko da, Bilboko Deportivoko pilotalekuan
Jai Alai Leagueko 2025eko Iron Cup txapelketa aurkeztu dute asteazken honetan, apirilaren 23an, Bilboko Deportivon. Txapelketa EITB Median izango duzu ikusgai, oso-osorik, eitb.eus-en eta ETBn.
Iron Cup txapelketa apirilaren 25ean hasi eta maiatzaren 30ean bukatuko da. Emakumezkoen zein gizonezkoen mailetako txapelketak jokatuko dira. Deportivok hartuko ditu norgehiagoka guztiak.
Gizonezkoen mailakoa Slam kategoriakoa izango da, eta sei bikote ariko dira lehian, bi multzotan banatuta. A multzoa Erkiaga-Gorka, Olharan-Lekerika eta Laduche-Del Rio bikoteek osatuko dute. B multzoan egongo dira: Goixerri-Lopez, Urreisti-Ibarluzea eta Barandika-Basque. Multzoetako bi onenak sailkatuko dira finalerdietara; A multzoko lehenak B multzoko bigarrenaren aurka jokatuko du, eta B multzoko lehen sailkatuak A multzoko bigarrenaren kontra. Finalerdietako irabazleak finalean lehiatuko dira elkarren kontra.
Ekaitz Mendizabal "Goixerri" aurrelari gipuzkoarra da gizonezkoen mailako txapelketak dakarren berritasun nagusia. Euskal Herriko hasiberrien txapelketetan dena irabazi ostean, 2019an Estatu Batuetan debutatu zuen (Dania Jai Alai) eta 25 urterekin, Miamiko Magic City pilotalekuko izarra da.
Ligaxkako fasea apirilaren 25etik maiatzaren 9ra artean, biak barne, jokatuko da; finalerdiak, maiatzaren 16an eta 23an; eta, finala, maiatzaren 30ean.
Bestalde, emakumezkoen mailako txapelketa Master Series kategoriakoa izango da, maiatzaren 16tik 30era artean jokatuko da, eta lau bikote hauexek ariko dira txapelak lortzeko lehian: Elaia-Frida, Helena-Maia, Ihart-Maialen eta Maite-Oaia.
Finalerdi eta final formatua izango du emakumezkoen Iron Cupak. Elaia-Frida vs Helena-Maia finalerdia maiatzaren 16an jokatuko da; bigarren finalerdian, maiatzaren 23an, Ihart-Maialen eta Maite-Oaia ariko dira nor baino nor gehiago. Finala maiatzaren 30ean jokatuko da.
2025eko Iron Cupeko partiden datak:
Apirilak 25, ostirala:
GOIXERRI-LOPEZ vs URREISTI-IBARLUZEA (B multzoa)
ERKIAGA-GORKA vs OLHARAN-LEKERIKA (A multzoa)
Maiatzak 2, ostirala:
GOIXERRI-LOPEZ vs BARANDIKA-BASQUE (B multzoa)
LADUCHE-DEL RIO vs 1. jardunaldiko irabazleak (A multzoa)
Maiatzak 9, ostirala:
BARANDIKA-BASQUE vs URREISTI-IBARLUZEA (B multzoa)
LADUCHE-DEL RIO vs 1. jardunaldiko galtzaileak (A multzoa)
Maiatzak 16, ostirala:
ELAIA-FRIDA vs HELENA-MAIA
GIZONEZKOEN 1. FINALERDIA
Maiatzak 23, ostirala:
IHART-MAIALEN vs MAITE-OAIA
GIZONEZKOEN 2. FINALERDIA
Maiatzak 30, ostirala:
FINALAK
Zure interesekoa izan daiteke
Elaia eta Frida, 2025eko Iron Cupeko txapeldunak!
Elaiak eta Fridak buelta eman diote Iharten eta Maialenen aurka galtzen hasi diren partidari, eta garaile atera dira finalean. Lehen seta 11-15 galdu arren, bigarrenean 15-11 nagusitu dira eta set erabakigarrian hutsean utzi dituzte aurkariak (5-0).
Erkiagak eta Gorkak jantzi dituzte 2025eko Iron Cupeko txapelak
Erkiagak eta Gorkak hirugarren setera arte itxaron behar izan dute Barandika eta Basque garaitzeko. Lehia estua izan dute bi bikoteek, baina irabazleak garaiz esnatu dira txapelak bereganatzeko (15-9, 6-15 eta 5-3).
Barandikak eta Basquek partida irauli dute Iron Cupeko finalean sartzeko
Lehen seta galdu arren, Barandikak eta Basquek finalaurrekoari buelta ematen jakin dute, eta Laduche eta Del Rio mendean hartu dituzte (14-15, 15-7 eta 5-4). Horrela, Erkiaga eta Gorka izango dituzte aurkari final handian.
Ihart eta Maialen izango dira Elaiaren eta Fridaren aurkariak Iron Cupeko finalean
Ihartek eta Maialenek finalerdi bikaina jokatu dute, eta bi setetan garaitu dituzte Maite eta Olaia (15-7 eta 15-12). Hala, Elaia eta Fridaren aurka lehiatuko dira finalean, horiek aurreko finalerdian irabazi ondoren.
Erkiaga eta Gorka finalerdi bikaina eginez pasatu dira Iron Cupeko finalera
Erkiagak eta Gorkak aise menderatu dituzte Urreisti eta Ibarluzea Iron Cupeko finalerdietan. Lehen seta lehiatuagoa izan da, baina bigarrenean Erkiaga eta Gorka jaun eta jabe izan dira eta finalerako txartela lortu dute (15-10 eta 15-5).
Elaia eta Frida, Iron Cupeko lehen finalistak
Helena eta Maia argi eta garbi nagusitu dira finalerdiko lehen setean, baina Elaia eta Frida suspertu egin dira eta bigarrenean buelta eman diote partidari. Behin betiko setean, Elaia eta Frida finalerako sailkatu dira (8-15, 15-10, 5-3).
Barandika eta Basque Laduche eta Del Rioren aurka lehiatuko dira Iron Cupeko finalerdietan
Barandikak eta Basquek bi setetan menderatu dituzte Urreisti eta Ibarluzea B multzoko lider gisa heltzeko finalerdietara. Hala, bigarren partidan nagusi izan diren Laduche eta Del Rio izango dituzte aurkari, horiek Olharan eta Lekerika garaituta heldu baitira finalerdietara.
Erkiaga-Gorka eta Barandika-Basque sailkatu dira Iron Cupeko finalerdietara
Iron Cup txapelketako bigarren jardunaldian, A multzoko partidan, Laduchek azken sakean egindako pasak Erkiaga eta Gorkari eman die garaipena. B multzoan, Barandikak eta Basquek bi setetan (11-15 eta 9-15) menderatu dituzte Goixerri eta Lopez.
Urreisti-Ibarluzea eta Erkiaga-Gorka nagusitu dira Iron Cup txapelketaren estreinuan
Urreisti eta Ibarluzea bi setetan nagusitu dira (14-15 eta 11-15) Goixerri eta Lopezen aurka jokatutako lehen partidan. Bigarrenean, Erkiagak eta Gorkak ere Olharan eta Lekerika menderatu dituzte bi setetan (15-8 eta 1-13).
2025eko Iron Cup txapelketa aurkeztu dute: apirilaren 25etik maiatzaren 30era artean jokatuko da, Bilbon
Bilbon aurkeztu dute 2025eko Iron Cup txapelketa. Gizonezkoen mailan Slam kategoriako txapelketa izango da; emakumezkoen mailan, aldiz, Master Series kategoriakoa. Partida guztiak eitb.eus-en eta Euskal Telebistan izango dituzu ikusgai.