Peticiones de los jugadores

Euskadiko Futbol Federazioak (EFF), jokalariok aurkeztutako agiriari

emandako erantzunen inguruan hausnarketa egin ondoren, berriro ere

zuengana zuzentzen gara zehaztapen gehiago eman asmoz. Baina, ezer baino

lehen, gure haserrea azaldu nahi dizuegu, azken bileran hitzartu genuena ez

duzuela bete uste dugulako. Beste behin ere, bileran izandako jokalarien izenak

eta bileraren edukia (nahiz eta ez oso modu zuzenean) prentsan agertu dira.

Albistea hedabideetara nondik iritsi den ziur jakiterik lortu ez badugu ere,

zuetakoren bat dela uste dugu emandako hitza bete ez duena. Ez zaigu oso

jarrera heldua iruditzen zuen aldetik, batez ere honelako gai eta une delikatuan

gaudela. Ez dugu onartuko horrelako beste azpi-jokorik, ez eta gure izenen

erabilera interesaturik. Espero dugu, beraz, ohar hontatik aurrera horrelakorik

ez berriz gertatzea.

Hemen azaltzen diren puntu guztiak, batzuk oso sinbolikoak iruditu arren,

arduraz eta serio lantzeko eskatzen dizuegu. Bileretan behin eta berriz mahai

gainean izan ditugun gaiak dira, eta bidean aurrera egin dezagun, publikoki

ardurak hartzeko eskatzen dizuegu. Zuen asmoak benetakoak direla jakiteko,

ez zaigu beste biderik geratzen. Ez dugu hitz hutsezko borondate ederrik

onartzen. Bada garaia gure selekzioaren ofizialtasunaren bidean genezakeena

egiten serio has gaitezen. Horrela, bidea urratuz, joango gara ikusten non

dauden ezintasunaren mugak, eta muga horiekin topo egitean pentsatuko dugu

horiek gainditzen nola saiatu. Ez dugu adostasun sinboliko argazkitarakorik

nahi, sinismenik gabeko bide lagunik ere ez, ofizialtasunaren bideko lekukoa

serio hartuko duen federazioa nahi dugu, jokalariok amets horrek elkartzen

baikaitu. Gurekin batera indar egingo duen federazioa sentitu nahi dugu,

bestela, elkar lan honi ez diogu arnas luzea ikusten.

Baldintzak:

1.- “Araba, Bizkaia, Gipuzkoa, Nafarroa Garaia, Nafarroa Beherea,

Lapurdi eta Zuberoa ordezkatzen dituen selekzioa da gure selekzioa. Ez

gara Espainiako selekzio autonomiko bat. Nazio izaera duen selekzioa da

gurea eta ofizialtasuna behar dugu, munduaren aurrean gure Herria ere

ordezkatua egon dadin”.

Goian aipatzen dena partida aurkezpen guztietan EFFk bere egitea

eskatzen dugu, publikoki. Hori zabaltzeko pertsona egokiena haren goreneko

ordezkaria (presidentea) dela uste dugu. Gustatuko litzaiguke, bere ahotik

horretan sinesten duela entzutea, bileretan entzun ditugun kontuak benetakoak

direla jakiteko. Halere, bide hori egokiena dela uste ez baduzue, prest gaude

prozedura adosteko. Baina, beti ere, Federazioak selekzioaren izaeraren

inguruan duen ikuspegia (goian aipatzen dena) garbi azaldu beharko du

publikoki jendartearen aurrean. Ez dugu mezu bikoitz edo nahasgarririk

onartuko. EFFren eta jokalarion ikuspegia berdinak direla somatu nahi genuke,

behingoz. Hori da gure nahia.

Honetaz gain, aurkezpenerako karteletan Euskal Herriko mapa modu

ikusgarrian azaltzea eskatzen dugu. Selekzioaz hitz egitean 7 euskal herrialdez

osaturiko selekzioaz ari garela garbi gera dadin.

2.- Partida guztien aurretik, zelaian argazkia aterako dugu jokalari eta

EFFko kideek pankarta batekin. Bertan “Nazio bat gara: ofizialtasuna!”

jarriko du, eta Euskal Herriko mapa azalduko da.

Behin baino gehiagotan esan izan zaigu EFFtik jokalarioi pankartarik ez

ateratzeko. Eta, aurrerantzean arazorik egon ez dadin egin dugu eskaera hori.

Argi eta garbi adierazi nahi dugu zeren ofizialtasuna nahi eta behar dugun,

eta zergaitik. Zazpi euskal lurraldeetako jokalariz osatutako selekzioaren

ofizialtasuna da nahi duguna, behar duguna, nazio bat garelako. Eta mezu hori

zelaian bertan ere argi azaltzea ezinbestekotzat jotzen dugu.

3.- Euskadiko Futbol Federakundea, Araba, Bizkaia eta Gipuzkoara

mugatutako federazioa izanik ere, selekzioa 7 lurraldetara zabaltzen

denez: Nafarroa eta Iparraldeari begira ere lan egiten hastea eskatzen

dugu. Honetarako, herrialde horietako federazio eta klubekin elkarlan

asmoak eta herrialde horietan partidak antolatzeko beharrezko diren

pausuak ematen hasiko dela publikoki adieraziko ditu EFFk (kasu honetan

ere, hori zabaltzeko pertsonarik egokiena presidentea dela uste dugu,

baina prest gaude prozedura adosteko). Halaber, publikoki onartzea

eskatzen dugu, partiden antolaketa hori EAEko federazioaren

eskumenetik kanpo geratzen bada, beste antolaketa modu bat beharko

lukeela gure selekzioak aurrerantzean.

Guk ez dizuegu ezinezko ezer eskatzen. Borondate kontua da. Dituzuen

asmoen berri eta aurrera begirako ikuspegia eta lan-ildoa publikoki garbi

azaltzea baino ez dugu eskatzen. Guk, ez dizuegu epe motzean Nafarroan edo

Iparraldean partida bat antolatuko duzuela publikoki ziurtatzeko eskatzen

(badakigu, adibidez, Lapurdi, Nafarroa Beherea eta Zuberoa barnebiltzen

dituen futbol federaziorik ez dagoela, gaur egun). Baina, “zazpi lurraldeetako

jokalariak hautatzeko irizpidea” mantentzen duzuela aipatzen duzuen era

berean, onartu beharko zenukete bi lurralde horietan ere Euskal Herriko

Selekzioarekin jokatzeko aukera izan beharko genukeela. Eta etorkizunean hori

egia bilaka dadin, bide hori egiten hasi gaitezen EFFk bere eskuetan dituen

bitarteko guztiak jartzeko eskatzen dizuegu.

EFF prest al dago, esate baterako, nafar jokalariek Nafarroan Euskal

Herriko Selekzioarekin partida jokatzeko duten eskubidea publikoki aldarrikatu

eta bide horretan lan egiteko konpromezua hartzeko? Jokalari nafar batek

Euskal Herriko Selekzioan jokatzeko aukera baldin badu, naturalki, Euskal

Herriko Selekzioak Nafarroan ere jokatzeko aukera izan beharko luke. Eta

Iparraldean berdin.

4.- EFFak FIFA data guztiak gure selekzioari ere onartzeko eskaera

egitea eskatzen dugu. Hauen erantzuna ezezkoa den kasuan EFFk (kasu

honetan ere presidentea litzateke egokiena gure ustez, baina prozedura

adosteko prest gaude) publikoki hau salatu egingo du, honetarako

antolatutako prentsaurreko baten bidez. Garbi adieraziko du bertan,

mugak nondik datozen, eta EFFaren helburua 7 lurraldeetako euskal

selekzioaren ofizialtasuna dela.

FIFA data guztiak eskatzeak badu zentzua. Gainontzeko selekzioek data

horietan jokatzeko aukera dutela jakinik, nazio selekzio bat garela

aldarrikatzeko beste modu bat, beste bide bat da guri ere FIFA datak onartzeko

eskatzearena. Beste kontu bat da, gero data horiek erabiliko liratekeen edo ez.

Eta, erantzuna ezezkoa den kasuan “hori jendarteratu” egingo duzuela

erantzun diguzue. Nola egingo duzuen jakin nahi dugu, jendarteak egoera zein

den jakitea garrantzitsua dela uste dugulako. Horretarako antolatutako

prentsaurreko baten bidez egitea iruditzen zaigu modurik eraginkorrena. Eta

garbi adierazi bertan mugak nondik datozen eta EFFren helburua 7

lurraldeetako euskal selekzioaren ofizialtasuna dela.

5.- Aspalditxoan hitzez sarri aipatu bai, baina pausurik eman ez den

“Nazioarteko Txapelketa”ren antolaketa martxan jartzea eskatzen dizuegu.

Helburua: “Nazio bat gara eta ofizialtasuna behar dugu” esatea mundua

zehar.

EFFri, urtean partida bat baino gehiago jokatuaz, “Nazioarteko Txapelketa”

antolatzeko asmoa duela publikoki aitortzeko eskatzen diogu. Baina aitormen

hutsa ez dugu askietsiko, bide hau urgentziaz urratu beharrekoa dela

baiteritzogu. Beraz, 6 hilabetetako epean gure selekzioarentzat egutegi ofizial

bat aurkezteko konpromezua har dezala EFFk . Bide honetan benetako

sinismena duzuela jakin nahi dugu. Urteak daramatzagu kontu hauetaz

hizketan, eta horregaitik, oraingoan epe jakin baten barruan zerbait publikoki

aurkeztuko duzuenaren ziurtasuna nahi dugu.

6.- Lehen ere esan genuen: gure selekzioa Euskal Herriko selekzioa

da. Hautsak harrotu zituen gai honek, hedabide asko gaiaren mamia

nahasten eta eztabaida behar ez zen lekuetara eramaten saiatu zirelako,

besteak beste. Orain, berriro diogu: Euskal Herria da gure ustez selekzioa

izendatzeko izenik egokiena. Baina, aurrera egiteko borondatea dugu.

Garbi utzi nahi dugu beste behin ere selekzioaren izenak baino askoz

gehiago kezkatzen gaituela selekzioaren izanak. Eta horregatik, eta betiere

aurreko puntuetan adostasuna lortzen badugu,

honakoa onartzeko prest gaude: Euskal Selekzioa terminoa erabiltzea

partiden aurkezpenetan.

Baldin eta aurreko 6 baldintzentatik zerbait onartzen ez baduzue, edo

etorkizunerako proposatutako lan ildoak lantzeko asmorik ez baduzue,

eskertuko genizueke hala adieraztea eta azaltzea, bai guri, bai euskal

jendarteari ere, nahasmenik egon ez dadin, ez eta joko bikoitzik ere. Azken

batean, zintzotasunez jokatzeko baino ez dugu eskatzen. Gurea ez da

konfrontazio jarrera bat. Gu, Euskal Herriko futbol selekzio ofiziala lortzeko

bidean eraginkortasuna bilatzen dugun euskal futbolariak gara. Munduko beste

edozein futbol jokalarik bezala, zein taldetan jokatu erabakitzeko eskubidea

baino ez dugu eskatzen. Inposiziorik gabe, bakoitzak bere izatearekin

koherentzian. Eskatzen dizueguna da zuek ere, gure maila berean, helburu

beraren bila zuen esku dagoen guztia egitea, besterik ez. Eta gehiago egiten ez

baduzue, garbi gera dadila zergatik ez duzuen egiten: saiatuta gehiago ezin

duzuelako ala saiatu nahi ez duzuelako.

Esan bezala, euskal futbol jokalariak, jarrera ardutasua izanik, prest gaude

partida jokatu dedin akordio batera iristeko eta etorkizunean elkarlanean

aritzeko. Baina beti ere, akordioa zertan datzan eta etorkizuneko lan ildoak

zeintzuk diren garbi adieraziz euskal jendarteari.

Elkar ulertuko dugulakoan, zuen erantzunaren zain geratzen gara.

2010ko azaroa

Euskal Herriko Futbolariak