Realeko zaleek Errege Koparekin argazkia hartu ahalko dute, ekainaren 19tik, 3 edo 6 euro ordainduta

Realeko zaleek talde txuri-urdinak apirilaren 18an irabazi zuen Errege Koparekin argazkia hartu ahal dute, ekainaren 19tik aurrera (ostirala da), klubak irekiko duen tituluaren gaineko erakusketa baten testuinguruan; hain zuzen ere, “GUazen KOPAREKIN” erakusketa da, eta horrek garaikurrarekin argazkia hartzeko aukera izango da. Bisita egin nahi dutenek sarrerak erreserbatu beharko dituzte; bazkideek, akziodunek eta RS Fanek 3 euro ordaindu beharko dute, eta gainerako zaleek, 6.

Arestian esan bezala, erakusketa Anoetan izango da; sarbidea 8. atearen ondoan dagoen Keler Espaziotik egin beharko dute bisitariek. Realak zehaztu duenez, ikusgai izango dira “finaleko elementu eta dokumentu esklusiboak”, jendeak deskubritu ahalko ditu ezezagunak ziren istorioak “eta gure Kopako ibilbideari buruzko kontakizun bisualak”. “Eta, noski, altxor handienarekin, gure Kopa maitearekin, argazkia hartuko duzu”, nabarmendu du Donostiako klubak.

Hala, bisitariek sarrerak erreserbatu beharko dituzte, Realaren web orrian. Bazkideek, akziodunek eta RS Fanek 3 euroren truke eskuratuko dituzte (taldeka joanda, gutxienez lau bazkide, akziodun edo RS Fan batuta, bakoitzak 2,5 euro ordaindu beharko du), eta zaleek, ordea, 6 euro eman beharko dituzte.

“GUazen KOPAREKIN” erakusketara joateko txandak, gehienez, 30 minutukoak izango dira; goizez, sei txanda izango dira, 10:30etik 13:30era, eta arratsaldez, aldiz, bederatzi, 15:00etatik 19:30era. Erakusketa abuztuaren 31ra arte izango da zabalik.