Palistek grebara joko dute martxoaren 21ean

Palista profesionalek grebara jotzea erabaki dute, ostegun honetan, hilaren 20an, Innpala enpresarekin egindako batzarrean ez baitute akordiorik lortu.

Horrenbestez, hilaren 21ean, ostiralean, greba egingo dute palistek; hala, bada, ez dute jokatuko Urrezko Pala Pro txapelketako azken-aurreko jardunaldia, martxoaren 21erako aurreikusita baitzegoen.

ELA sindikatuak hauxe jakinarazi du: "Martxoaren 21ean Innpala enpresako pilotariek greba egingo dute enpresaren eta Aldundiaren utzikeriaren aurrean, bi lankideren kaleratzeen aurrean. Bilera saiakera askoren ondoren, Ibai Perez eta Iker Gordon palisten kaleratzeen ondoren iritsi da greba. Ez Innpalak, ez Aldundiak, zerbitzuaren azken arduradunek, ez dute inolako konponbiderik eman".

Gauzak horrela, ELAk adierazi du palistek elkarretaratzea egingo dutela martxoaren 21ean, Mungiako Matxin Enparantza plazan, pilotalekuaren aurrean.

Necol eta Urkijo, Inppalaren kudeatzaile berriak

Asteartean, martxoaren 18an, Innpalaren eta palisten arteko batzarra egin zen, baina batzarrarekin beharrean, beste bilera mota batekin topatu ziren. Ordura arte enpresa kudeatzen zuen Jose Ramon Garaik jakinarazi zien Dan Necol palista eta Josu Urkijo pilotaria jabetu zirela elkartearen partaidetzaz.

Palistak harrituta geratu ziren, eta bi egunen buruan batzarrera gonbidatu zituzten kudeatzaile berriak.

Albistea jaso ostean, Iñaki Urrutia palistak azaldu zion EITB Mediari martxoaren 18ko bileran gertatutakoa. "Etorri da Jose Ramon Garai gure nagusia eta esan digu bere enpresa, Innpala, Josu Urkiijok eta Dan Necolek erosi dutela, dokumentu bat irakurri du bost minutuan, eta atzeko aldetik joan da", azaldu zuen Urrutiak.

Ondoren, Iñakik gaineratu zuen Josu Urkijok egoera zein zen azaldu ziela. Azalpenak jasota, palistek kudeatzaile berriei esan zieten haien artean hitz egingo zutela, eta ostegun honetako bilerara gonbidatu zituzten.

Innpala eskuz aldatzeak "oso harrituta" utzi zituen palistak, eta dena kolokan geratu zen martxoaren 20ko bileraren zain.

Palisten eskakizunak

Innpalak duela egun batzuk iragarri zuen pala profesionaletik erretiratuko dela, eta haren kudeaketa utziko duela. Palistei eskaini zien eurek eraman zezatela kudeaketa.

Palistek eskatzen zuten Innpalak bere betebeharrak bete zitzala, lizitazioarekin jarraitu bitartean. Horrez gain, kontratua amaitzear duten palisten kontratuak luzatzeko eskatzen zuten, Bizkaia pilotalekuaren lizitazio berria egin arte. Adibidez, Ibai Perezen kontratua martxoaren 30ean amaituko da, eta Innpalak iragarri zuen ez zuela bizkaitarrari kontratua berritzeko asmorik. Iker Gordoni apirilaren 1ean bukatuko zaio kontratua, eta Esteban Gaubekaren kontratua apirilaren erdialdean amaitzekoa da.